Кураторлық жазба:

To Hold a Mountain фильмінде камера күнделікті тіршіліктен таңқаларлықтай әсерлі көріністерді тауып көрсетеді. Ол кейіпкерлер өміріндегі табиғи мизансахналарды дөп баса біледі. Кадрлар қаншалықты көз тартарлық болғанымен, фильм бұл шынайы өмірді асыра әрленген суретке айналдыра қоймайды. Бұл туындыда Синяевина жай ғана әдемі фон емес: оның беткейлері, тұманы мен құбылмалы ауа райы оқиғаның толыққанды бір бөлшегіндей қабысып жатыр. Жекелеген эпизодтардың шебер ұштастырылғаны соншалық, кей сәттерде фильм кәдімгі көркем киноға ұқсап кетеді. Дегенмен, камера өзін жасырып әуре болмайды: кейбір қиын сәттерде кейіпкерлер объективке тура қарайды. Олардың жанарынан авторлар мен кейіпкерлер арасындағы бірнеше жылға созылған түсірілім барысында қалыптасқан риясыз жақындық пен үлкен сенімді анық аңғаруға болады.

‍

Сипаттамасы:

Гара мен оның қызы Наданың өмірі өздері мал жаятын Черногориядағы Синяевина тау жотасымен тығыз байланысты. Билік бұл мекенді НАТО-ның әскери полигонына айналдыруға бекінгенде, Гара қарсылық қозғалысының белді мүшелерінің біріне айналады. Фильм кейіпкерлер мен оларды қоршаған кеңістікті жіті бақылай отырып, тау үшін күрес тарихын оны қорғап қалуға қауқары жететін қайсар жандар жайлы поэтикалық хикаяға ұластырады.

‍

Фильм тілдері:

черногор тілі

‍

Фестивальдер мен марапаттар:

Жүлде: Sundance Film Festival, 2026, Әділ қазылар алқасының гран-приі · World Cinema Documentary Competition

‍